Ciidamada Dowladda oo bur buriyay fariisimo Al-Shabaab ku lahaayeen Deg. Galhareeri ee G/Galgaduud.
Ciidanka Qaranka ayaa hawlgal milateri oo jab loogu geystay Khawaarijta ka fuliyay gudaha Degmada Galhareeri oo ka tirsan Dowlad Goboleedka Galmudug.Hawlgalkan qorsheysan ayaa waxaa lagu beegsaday saddex xarumood oo Khawaarijtu ay ku sugnaayeen.
Goobaha la beegsadey waxaa ka mid ah garaash ay Khawaarijtu ku diyaarinaysay waxyaabaha qarxa, waxaana halkaas lagu burburiyay toddobo gaari oo yaalay garaashka.
Goobta labaad waxay ahayd bakhaar hub oo ay Khawaarijtu lahayd waana la gubay.
Goobta sadexaad waxa ay ahayd xarun Kha2waarijtu ay ku tababari jireen malleeshiyaadkooda.
Galhareeri ayaa Khawaarijta u ah xarun wayn oo ay u arkayeen in ay ku amaan galayaan. Hawlgalkaani wuxuu qayb ka ahaa hawlgallo isdaba joog ah oo Ciidanka Qaranka Soomaaliya ku burburinayaan xarumaha Khawaarijta kuna beegsanayaan saadka iyo isku socodka Khawaarijta.
Dowladda Soomaaliya waxa ay u mahad celinaysaa shacabka Soomaaliyeed iyo saaxiibada caalamiga ah oo ku garab taagan dagaalka lagu ciribtirayo Khawaarijta iyo fikirkooda.
Dowladda waxaa ka go’an in ay laban laabto dagaalka Khawaarijta ay kula jirto si loo ciribtirro waqtiga dhow, waxayna ugu baaqaysaa maleeshiyaadka Khawaarijta marin habaabiyeen ee ku sugan deegaanada ay haraadiga ku yihiin in ay naftooda badbaadsadaan iskuna soo dhiibaan geesiyaasha ciidanka qaranka .
