Dalal dhowr ah oo Xulifo la ah Ukraine ayaa welwel ka muujiyay qorshaha Ruushka uu Hubka Nukliyeerka ugu rakibanayo Dalka Beralus, waxa ay ku sheegeen in qorshahaas uu sababi karo cabsi xooggan oo la xiriirta in Moscow hubkaas adeegsan karto marka xaaladdu ku xumaato.

Madaxweynaha Ruushka Vladimir Putin ayaa sheegay in dagaalka uu dalkiisa ku jiro awgeed uu hubkaas Beralus ugu rakibanayo si uu welwel xooggan u geliyo dalalka is xulufeysanaya ee waddankiisa colaadinaya.

Mareykanka ayaa sheegay in uusan marnaba aaminsaneen in Ruushka uu adeegsan karo Hubka Nukliyeerka marka la eego saan-saanta laga muujinayo dhaqdhaqaaqa ciidan iyo qorshaha cusub ay Xukuumadda Putin soo bandhigtay.

Waddamo dhowr ah oo Yurub badan ayaa ka aragti duwan aaminsanaanta Mareykanka ee ah in uusan Ruushka adeegsan Karin hubka halista badan ee dunida laga mamnuucay in la adeegsado ee Nukliyeerka maadaama horay loo yiri Ruushku ma weerari karo Ukraine balse la arkay 24kii Febaraayo 2022 duullaan toos ah uu ku qaaday dalkaas.

Dhaqdhaqaaqa Ruushka uu sameynayo ayaa indhaha lala raacayaa waxaana muuqda welwel xooggan oo ka dhashay tallaabooyinka colaad muujineed ee Moscow si ay isaga khafiisiyo culeyska ay ku hayaan dalalka kala safanaya Ukraine.