War Deg Deg ah: Maamul goboleedyada Soomaaliya oo joojiyay wadashaqeynta Wasaaradda Maaliyadda.
Wasaaradaha Maaliyadaha ee shanta dowlad goboleed ee xubnaha ka ah dowladda federaalka ah ee Soomaaliya ayaa xiriirka u jaray Wasaaradda Maaliyadda ee xukuumadda dhexe ee Soomaaliya, sida uu BBC-da u xaqiijiyay sarkaal sare oo ka tirsan wasaaradda maaliyadda ee Puntland.
![](https://somaliweyn.org/wp-content/uploads/2022/08/Astaamaha-Dowlad-Goboleedyada-780x470-1.jpg)
Warqad ay ku wada saxiixan yihiin wasiirrada maaliyadda ee shanta dowlad goboleed, ee kala ah Puntland, Galmudug, Jubbaland, Koonfur-galbeed iyo Hir-shabeelle ayaa lagu faafiyay baraha bulshada.
Warqaddaas waxaa lagu sheegay in laga billaabo maanta, oo ah 30-ka August, 2022, ay joojiyeen wadashaqeyntii kala dhaxeysay wasaaradda maaliyadda ee xukuumadda federaalka Soomaaliya, taasoo ay ku eedeeyeen baal-marista heshiisyo hore, “inta ay wasaaraddu kusoo laabanayso xeyndaabka sharci”.
Waxay tixraac ahaan usoo taxeen heshiisyo “wadar-tashi iyo wadar-oggol” ay ku tilmaameen oo ay horay ula gaareen wasaaradda, kuwaasoo kala ah:
1. Heshiiskii Addis-Ababa ee September 2019.
2. Heshiiskii Kismaanyo ee November 2019.
3.Heshiiskii Kampala ee December 2019.
4.Heshiiskii Nairobi ee January 2020.
5.Heshiiskii Muqdisho ee August 2020.
![](https://somaliweyn.org/wp-content/uploads/2022/08/image-24.png)
Wasaaradda maaliyadda ee dowladda federaalka ayaan la xiriirnay si aan uga helno jawaab la xiriirta warqaddan, laakiin weli nooma suurtagelin.